Hər gün kartof qızartması yesəniz, bu xəstəliklərlə üzləşə bilərsiniz

Kartof yüksək karbohidrat tərkibli və enerjili qida mənbəyidir.

Düzgün bişirildikdə faydalı ola bilər, lakin qızartma və ya çox tez-tez istehlak edildikdə sağlamlığa ciddi mənfi təsirlər göstərər.

Kartof yüksək qlisemik indeksi olan bir qidadır. Çoxlu miqdarda kartof yemək qan şəkərinin sürətlə artmasına və insulin müqavimətinə səbəb ola bilər. Bu, uzunmüddətli dövrdə diabet riskini artırır. Kartofun faydalılığı onun bişirilmə tərzindən asılıdır. Qızardıldıqda kartofun kalorisi artır və zərərli trans yağlar əmələ gəlir ki, bu da sağlamlıq üçün təhlükəli ola bilər.

Kartof düzgün saxlanılmadıqda tərkibindəki solanin adlı toksin səviyyəsi artır. Bu, həzm pozğunluğuna, başağrısına və hətta sinir sisteminə mənfi təsir göstərə bilər.

Qızartma kartof çox miqdarda yağla bişirildiyindən damarların tıxanmasına və xolesterin səviyyəsinin artmasına səbəb olur, ürək-damar xəstəlikləri riskini artırır. Hər gün qızartma kartof yemək yüksək kalori qəbulu deməkdir. Bu, çəki artımına, piylənməyə və maddələr mübadiləsi problemlərinə səbəb ola bilər.

Tez-tez qızartma kartof yeyən insanlar arasında 2-ci tip diabet riski daha yüksəkdir. Qızardılarkən kartofda “akrilamid” adlı kanserogen bir maddə əmələ gəlir. Bu maddə xüsusən yüksək temperaturda qızartma zamanı yaranır və xərçəng riskini artırır.

Qızartma kartofda çox yağ və duz olur, bu da mədə-bağırsaq traktının funksiyalarını zəiflədə bilər. Xüsusilə həzm prosesində çətinliklər və turşuluq yaradar.

Kartof vitamin və bəzi minerallarla zəngindir, lakin qızartma prosesi zamanı bu qida maddələri əhəmiyyətli dərəcədə azalır. Nəticədə hər gün qızartma kartof yeyən insanlar balanssız qidalanma ilə üzləşə bilərlər.

Kartofu qızartmaq əvəzinə sobada, az yağla bişirmək daha sağlam seçimdir. Qızartma əvəzinə qaynadılmış və ya buxarda bişirilmiş kartof istehlak edin. Kartof qızartmasını həftədə bir dəfədən çox yeməkdən çəkinin. Qızartma üçün isə zeytun yağı kimi sağlam yağlardan istifadə edin.