Heydər Əliyev Mərkəzində "20 ilin sədası" adlı konsert keçirildi

Heydər Əliyev Fondunun 20 illiyinə həsr olunan konsert keçirilib.

“20 ilin sədası” adlı konsert proqramında Heydər Əliyev Fondunun yaradıcılıqlarında iz qoyduğu, dönüş yaratdığı, dəstək göstərdiyi ifaçılar çıxış ediblər.

Konsertdə Azərbaycan və xarici bəstəkarların əsərləri, xalq mahnılarımız səslənib. Hər bir ifa monitorda xüsusi görüntülərlə – Heydər Əliyev Fondunun 20 illik fəaliyyətini, müxtəlif sahələrdəki layihələri, o cümlədən ölkəmizin tanıdılmasına dair təşkil olunan tədbirləri, muğam müsabiqələri, festivalları əhatə edən videoçarxlarla müşayiət olunub.

Qeyd edək ki, Birinci vitse-prezident Mehriban Əliyevanın rəhbərliyi ilə 20 illik fəaliyyətində ulu öndər Heydər Əliyevin ideyalarına əsaslanan, elm və təhsil, səhiyyə, sosial və digər sahələrdəki önəmli layihələri ilə mühüm nailiyyətlərə imza atan, ən əsası isə insanların sevgi və inamını qazanan Heydər Əliyev Fondunun gördüyü işlərdə milli-mədəni və mənəvi dəyərlərimizin qorunub saxlanılması, onların təbliğ olunması xüsusi önəm kəsb edir.

Heydər Əliyev Fondunun 20 illiyi münasibətilə keçirilən konsert həmin uğurların kiçik bir hissəsinin nümayişi sayıla bilər.