Hipermarketdəki silahlı insidentə görə 3 nəfər həbs edildi
Xətai rayonunda yerləşən “Bravo” hipermarketdəki insidentdə şübhəli bilinən şəxslər saxlanılıb. Bu barədə Baş Prokurorluq və Daxili İşlər Nazirliyi birgə məlumat yayıb.
Bildirilib ki, keçirilən tədbirlər nəticəsində Ruhlan İsmayılov, Dəyanət Qudrətov, Azər Məmmədov və Səbuhi Qurbanovun qabaqcadan əlbir olduğu məlum olub. Onların bir qrup şəxs halında ümumi təhlükəli üsulla və quldurluqla əlaqədar qəsdən adam öldürmə, adam öldürməyə cəhd, quldurluq və qanunsuz olaraq odlu silah, onun komplekt hissələrini, döyüş sursatını əldə edib saxlama və gəzdirmə cinayətlərini törətmələrinə əsaslı şübhələr müəyyən edilib.
İstintaq-əməliyyat tədbirləri nəticəsində şübhəli şəxs qismində saxlanılan Dəyanət Qudrətov, Azər Məmmədov və Səbuhi Qurbanova Cinayət Məcəlləsinin müvafiq maddələri ilə ittiham elan edilib. Məhkəmənin qərarı əsasında adıçəkilən şəxslər barəsində həbs qətimkan tədbiri seçilib.
Hadisə baş verən gün saat 21 radələrində yaxalanması istiqamətində keçirilən əməliyyat tədbirləri zamanı Ruhlan İsmayılov polis əməkdaşlarına qarşı silahlı müqavimət göstərdiyi üçün zərərsizləşdirilib. Onun gizləndiyi mənzilə istintaq-əməliyyat qrupu tərəfindən baxış keçirilərkən cinayət nəticəsində əldə olunan 16 835 manat və 20 100 ABŞ dolları pul, 2 avtomat və 1 tapança, çoxsaylı döyüş sursatları aşkarlanıb. Əməliyyat tədbiri nəticəsində saxlanılan şübhəli şəxs Dəyanət Qudrətovunun üzərindən isə 1 tapança aşkar edilərək götürülüb.
Cinayət işi üzrə istintaq və əməliyyat-axtarış tədbirləri davam etdirilir. Media nümayəndələri və sosial şəbəkə istifadəçilərindən rəsmi qurumla dəqiqləşdirilməmiş məlumatların paylaşılmaması bir daha xahiş olunur.