İçərişəhərdə Qarabağ mədəniyyəti ilə bağlı festival | "Gələnlər bunlara maraq göstərir" - Baku TV

Mayın 29-da Mədəniyyət Nazirliyinin maliyyə dəstəyi, “İçərişəhər” Dövlət Tarix-Memarlıq Qoruğu İdarəsi və “Qeyd-Sosial Maarifləndirmə” İctimai Birliyinin birgə təşkilatçılığı ilə İçərişəhərdə “Qarabağ Mədəniyyət Xəritəsi – Hər rayonun öz səsi” adlı genişmiqyaslı festivalın açılış mərasimi baş tutub.

Festivalın əsas məqsədi Qarabağın zəngin mədəni irsinin tanıdılması, milli-mənəvi dəyərlərimizin təbliği, eləcə də bölgənin mədəni potensialının geniş ictimaiyyətə təqdim olunmasıdır.

Tədbir çərçivəsində Qarabağ sərgisi, canlı musiqi proqramları, ənənəvi sənətkarlıq nümunələri, milli mətbəx təqdimatları və ustad dərsləri təşkil olunub.

Millət vəkili Vüqar İskəndərov bildirib ki, hər şəhərin, hər kəndin öz koloriti, mədəniyyəti və mətbəxi var:

“Bu həm şəhərsalmada, həm insanların xarakterində, həm də yaratdıqları mədəniyyət incilərində özünü göstərir. Bu gün keçirilən festivalda həmin incilər təmsil olunur. Çünki İçərişəhər təkcə Bakı sakinlərinin deyil, həm də paytaxtımıza gələn qonaqların çox olduğu bir yerdir. Beləliklə, biz turistlərimizə də gözəl Qarabağımızı, Şərqi Zəngəzurumuzu tanıdır və təbliğ edirik”.