İndi həsrət hissi ölüb | Şair Altay Yaşara görə sevginin düsturu necədir? - O VAXTLAR

“O vaxtlar” verilişinin yeni buraxılışı yayımlanıb.

Verilişin budəfəki sayında şair Altay Yaşar sevgi və dostluq münasibətlərindən söz açıb.

Şair eşqi əlçatmaz adlandırıb:

“Eşq, sevgi, məhəbbət bəzi qonşu xalqlarda bir sevgi anlamını daşıyır, amma bizim lüğətimizdə ədəbiyyatımızın zənginliyi səbəbindən eşqə ayrı status veririk. Eşq, ümumiyyətlə, sevginin ən üstün mərhələsidir. Mən üstəgəl sən sevgiyə bərabərdir. Eşqin düsturunda isə mən yoxdur. Eşq özündən keçib səndə yaşamaqdır”.

Altay Yaşarın sözlərinə görə, həsrət hissi öldüyü üçün sevgilərin təməli böyük olmur:

“Əvvəllər insan insanın heç şəklini tapa bilmirdi. O qədər sevgisini ilahiləşdirirdi ki, həmin sevgi ona ayrı bir enerji verirdi və onun dalınca düşə, yaşada bilirdi. Həmin əlçatmazlıq onu daha da sevgisinə bağlayırdı. İndi hər şey açıq-aydındır. Kim nə vaxt istəyirsə, telefonda sevgilisinin harada oturduğunu, yemək yediyini görə bilir. Həsrət hissi azaldıqca sevgidə bağlantılar zəifləyir. Sevən insan ziyansız olur, bağışlaya bilir, gözü parıldayır, daxilində kin hissini öldürmüş olur. Sevgi eşqin ilkin mərhələsi kimidir, görməklə sevirsən. Qəlbən, ruhən sevmək isə artıq eşqdir”.

A.Yaşar vurğulayıb ki, darıxmaq münasibətin ən gözəl tərəfidir:

“Ümumiyyətlə, insanı ondan xəbərsiz sevəcək, onun olmadığı yerdə dəyərli biləcəksən. Yatanda, öləndə, zindanda, fərqi yoxdur. Bir insana yanında hörmət etmək deyərdim ki, heç lazım da deyil. Əgər gücün varsa, yoxluğunda ona hörmət et”.