İranda saxlanılan Naxçıvan sakinləri azadlığa buraxıldı

Martın 21-də Türkiyənin Doğu Bəyazid ərazisi vasitəsilə İrana keçən soydaşlarımız elə həmin gün bu ölkənin Poldəşt şəhərində həbs ediliblər. Vüsal Quliyev və Rövşən Seyidov sonradan Maku şəhərinə aparılaraq orada İran təhlükəsizlik orqanlarının zindanında saxlanılıblar.

Həmyerlilərimiz avqustun 18-də sərbəst buraxılıblar.

“Dostum Rövşənin çantasında bayrağımız var idi. Təbrizdə həmin bayraqla şəkillər çəkdirirdik. Təbrizdən qayıdarkən Poldəşt şəhərində saxlanıldıq. Bizə dedilər ki, sizi dövlət göndərib. Amma bizi heç bir qurum göndərməmişdi”, – deyə Vüsal Quliyev bildirib.

Vüsalın atası Firudin Quliyev isə deyib ki, oğlunun sərbəst buraxılmasına hələ də inana bilmir. O, bir daha o ölkəyə getməyəcəyini də deyir.

Qeyd edək ki, İran məhkəməsi Vüsal Quliyev barəsində 4 ay, Rövşən Seyidov barəsində isə 6 ay müddətinə həbs qərarı vermişdi. 4 aylıq müddət bitdiyinə görə sərbəst buraxılmalı olan həmvətənlərimiz məhkəmədən sonra İran təhlükəsizlik orqanları tərəfindən yenidən həbs edilmişdilər. Ancaq avqustun 18-də 5 ay saxlanıldıqları həbsxanadan sərbəst buraxılıblar.