İrandan narkokuryerliyə cəlb edilən şəxs tutuldu

Abşeron rayonu Hökməli qəsəbəsində narkotiklərin satışı ilə məşğul olan və üzərində qanunsuz olaraq odlu silah saxlayan şəxslərə qarşı əməliyyatlar keçirilib və ümumilikdə 4 nəfər saxlanılıb.

Daxili İşlər Nazirliyinin mətbuat xidmətindən bildirilib ki, Abşeron Rayon Polis İdarəsinin Qobu Polis Bölməsinin əməkdaşları narkotik vasitələrin qanunsuz dövriyyəsi ilə məşğul olan Orxan Cəbrayılov və Nazim Abbasovu saxlayıblar.

Bu şəxslərdən külli miqdarda heroin və metamfetamin aşkarlanıb. Hər iki şəxsin narkotik vasitələri Hökməli qəsəbəsində yaşayan, əvvəllər məhkum olunmuş Fəqani Qeybullayevdən aldıqları müəyyən edilib. Bölmə əməkdaşları həmin şəxsi də saxlayaraq istintaqa təhvil verib. Onun üzərindən 3 kiloqrama yaxın heroin aşkarlanıb.

Fəqani Qeybullayev ifadəsində bir müddət əvvəl “Baba” adlı İran vətəndaşı ilə tanış olduğunu və onun maddi gəlir qarşılığında ölkə ərazisində narkokuryerlik təklifi ilə razılaşdığını bildirib. O, həmin şəxsin qaçaqmalçılıq yolu ilə Azərbaycana göndərdiyi narkotik vasitəni satmaq məqsədilə əldə etdiyini bildirib.

Bölmə əməkdaşları həmçinin üzərində qanunsuz olaraq odlu silah saxlayan, əvvəllər məhkum olunan Hikmət Burcəliyevi də saxlayıb. Ondan bir ədəd müvafiq sənədləri olmayan ov tüfəngi və 5 ədəd patron aşkarlanaraq götürülüb.

Faktlarla bağlı Qobu Polis Bölməsində toplanan materiallar Abşeron Rayon Polis İdarəsinə göndərilib, əməliyyat-istintaq tədbirləri davam etdirilir.