İş prosesi zamanı xəsarət alan vətəndaş inşaat şirkətindən narazı qaldı

Baku TV-nin qaynar xəttinə şikayət edən Cəlair Nəbiyevin sözlərinə görə, 2013-cü ildən “Tekfen İnşaat”da dəmirçi ustası kimi işləməyə başlayıb.

Adıçəkilən şirkətin müxtəlif layihələrində çalışan Cəlair Nəbiyev bildirib ki, iş prosesi zamanı xəsarət alıb. Bunun qarşılığında isə şirkət tərəfindən ona aylıq 500 manat qəza pensiyası təyin olunub.

“Şirkət mənə maddi və mənəvi ziyan vurub. Armaturları dəzgahın üstünə qoyanda onlar yuvarlanaraq sağ qolumun üzərinə aşdı. Nəticədə, sağ qol dirsəyimdə və barmağımda sınıqlar meydana gəlib. Şirkət bu barədə hüquq-mühafizə orqanlarına məlumat verməyib. Dövlət Əmək Müfəttişliyi Xidmətinə şikayətimdən sonra mənə aylıq 500 manat qəza pensiyası ayrıldı. Şirkət ölkəmizdə fəaliyyət göstərdiyi müddət ərzində sözügedən məbləğ ödənilməli idi, amma onlar verdikləri vədi tutmadılar. 2024-cü ilin yanvar ayında pensiyanın dayandırıldığını söylədilər və məni məcburi ağır işlərə cəlb etdilər ki, bezib qaçım”, – Cəlair Nəbiyev söyləyib.