İşğaldan azad edilən ərazilərdə təhlükəsizlik üçün hansı işlər görülür? - Baku TV

“İşğal dövründə mütəmadi olaraq minalanan keçmiş təmas xətti əraziləri azad olunmuş torpaqlarımızın ən çox çirklənmiş hissələri hesab olunur. İşğaldan azad edilmiş ərazilərdə aparılan bərpa-quruculuq işlərinə cəlb olunan insanların təhlükəsizliyinin təmin edilməsi əsas prioritetlərdən biridir. Bu məqsədlə dövlət tapşırığına uyğun olaraq ən çox minalanmış ərazilərdə fiziki baryer kimi çəpərləmə üsulundan istifadə olunub”.

Bu barədə Azərbaycan Respublikasının Minatəmizləmə Agentliyinin (ANAMA) Regional əməliyyat rəhbəri Xaliq Zülfüqarov məlumat verib.

O bildirib ki, minatəmizləmə əməliyyatları mərhələli şəkildə həyata keçirilir:

“Hazırda Ağdam rayonunun Cəvahirli kəndi ərazisindəyik. Burada Eyvazxanbəyli və Baş Qərvənd kəndlərinin qaz təchizatını təmin etmək məqsədilə çəkilən qaz xətti layihəsi üzrə ərazi təmizlənir. Bu ərazilər tam mina və partlamamış hərbi sursatlardan təmizləndikdən sonra çəpərlər ərazidən yığışdırılacaq”.