İşıqsız dirəklər, kələ-kötür yollar | Goranboy sakininin şikayəti

Bakı-Qazax avtomagistralında yaranan problemlər sürücüləri təngə gətirib.

Baku TV-nin qaynar xəttinə müraciət edən Əfqan Qasımov uzun müddətdir yollarda işıqların yandırılmadığını deyib:

“Burada işıq dirəkləri olsa da, sutkanın qaranlıq vaxtlarında işıqlandırma yox dərəcəsindədir. Piyadaları görmək olmur, bu da qəza şəraiti yaradır. Gecə vaxtı maşın sürüləsi deyil”.

Problemin tək işıqlandırma ilə bağlı olmadığını bildirən sürücü asfalt ürtüyünün yararsız hala düşdüyünü söyləyib:

“Demək olar ki, Gəncədən Bakıya qədər sağ zolaq pis gündədir. Yollar kələ-kötürdür, dağ yoluna bərabərdir. Xəstə ilə, uşaqla getmək mümkün deyil, çünki maşın hoppana-hoppana gedir”.

Məsələ ilə bağlı Avtomobil Yolları Dövlət Agentliyindən bildirilib ki, hava şəraiti düzələn kimi qısa müddət ərzində magistral yolun sözügedən hissəsində təmir işlərinin aparılması nəzərdə tutulub. İşıqlandırma ilə bağlı məsələ isə nəzarətdədir. Bununla bağlı təkliflər hazırlanaraq aidiyyəti üzrə təqdim olunub.