"İşləməyən eskalatorlar işləyənlərdən çoxdur" | Sakinlərin müraciətinə baxılmır? - Baku TV

Paytaxtın Səbail rayonunun Bayıl qəsəbəsinə gedən yolda, Bayraq Meydanı yaxınlığındakı yeraltı keçiddə eskalator iki ildən çoxdur fəaliyyət göstərmir.

Vətəndaşların sözlərinə görə, eskalator lentlə bağlanıb və qarşısına “işləmir” xəbərdarlığı qoyulub. Yeraltı keçiddən istifadə edən sakinlər, xüsusilə yaşlı insanlar və uşaq arabası ilə hərəkət edən valideynlər üçün pilləkənlərlə qalxıb-düşməyin çətinlik yaratdığını bildirirlər.

Bu, paytaxtda eskalatorlarla bağlı ilk problem deyil. Vətəndaşlar müxtəlif ərazilərdə eskalatorların uzun müddət işləmədiyini deyirlər. Bildirilir ki, bəzi eskalatorlar bir müddət işləsə də, daha sonra yenidən sıradan çıxır.

Məsələ ilə bağlı Avtomobil Yolları Dövlət Agentliyindən bildirilib ki, paytaxtda işləməyən eskalatorların təmiri və yenilənməsi Bakı Şəhər İcra Hakimiyyətinə tapşırılıb.

Bakı Şəhər İcra Hakimiyyətindən isə qeyd edilib ki, Avtomobil Yolları Dövlət Agentliyinin balansında olan eskalator və mexanizmlər yeniləndikdən sonra Bakı Şəhər İcra Hakimiyyətinin balansına qəbul ediləcək.

Bildirilib ki, yeni eskalatorlar artıq sifariş edilib. Hazırda mövcud eskalatorlara xidmət Avtomobil Yolları Dövlət Agentliyi tərəfindən həyata keçirilir.