İsmayıllıda Zərifə Əliyevanın xatirəsi anıldı

Görkəmli alim, oftalmoloq Zərifə Əliyevanın anadan olmasının 100 illiyi ilə əlaqədar İsmayıllıda tədbir keçirilib.

Aprelin 28-də Heydər Əliyev adına Mədəniyyət Mərkəzində keçirilən tədbirdə Rayon İcra Hakimiyyətinin rəsmi nümayəndələri, idarə, müəsissə, təşkilat rəhbərləri, səhiyyə işçiləri, şəhid ailələri və gənclər iştirak edib. Akademik Zərifə Əliyevanın həyat və fəaliyyətini əks etdirən film nümayiş olunub.

Qeyd edilib ki, görkəmli oftalmoloq Z.Əliyevanın həyat ideyaları və şəxsiyyəti bu gün müasir Azərbaycan gəncliyi üçün bir örnəkdir. Azərbaycan xalqına xas müsbət keyfiyyətlər, ali dəyərlər Zərifə xanımın şəxsiyyətində cəmlənib. O, göz xəstəliklərinin müalicəsi üzrə görkəmli alim olmaqla yanaşı, böyük ziyalı, dəyanətli ömür-gün yoldaşı və qayğıkeş ana kimi xarakterizə olunur.

Çıxış edənlər həmçinin akademik Z.Əliyeva ilə bağlı öz xatirələrini bölüşüblər. Sonda görkəmli oftalmoloqa həsr olunmuş musiqi və şeirlər səsləndirilib.