İtkin düşən qəhrəmanımız Natiq Qasımovun doğum günüdür

Yanvarın 2-si Natiq Qasımovun doğum günüdür.

Birinci Qarabağ müharibəsində itkin düşmüş Natiq Qasımov 5 gün ac-susuz qalsa da, bayrağımızı düşmənə verməyib.

O, 1971-ci ildə Gədəbəy rayonu, Kiçik Qaramurad kəndində anadan olub. Ermənistan silahlı birləşmələrinin torpaqlarımıza hücumu ilə bağlı 1991-ci ildə könüllü olaraq Ağdamda təşkil edilmiş “Qaradağ şahinləri” taboruna yazılaraq Vətənin müdafiəsində iştirak edib. 12 mart 1992-ci ildə Xocalı rayonu, Pirlər kəndi istiqamətində gedən döyüşdə Ermənistan hərbçiləri tərəfindən əsir götürülüb.

Natiq Qasımov Xocalı rayonu, Pirlər kəndi yaxınlığında yüksəklikdə yerləşən Alban kilsəsi uğrunda döyüş zamanı 6 döyüş yoldaşı həlak olduqdan sonra 5 gün ac-susuz orada qalaraq təkbaşına döyüşüb. Gülləsi qurtardığından altıncı gün, 12 mart 1992-ci ildə rusiyalı və italiyalı jurnalistlər – Konstantin Smirnov və Enriko Sarzinin şahidliyi ilə Ermənistan hərbçiləri tərəfindən əsir götürülüb.

Onun haqqında real faktlar əsasında çəkilən “Oğul” sənədli filmi xüsusi maraqla qarşılanıb.