Hikmət Hacıyevdən BQXK-ya tənqid | Ermənistan Natiq Qasımovla bağlı...

“Azərbaycan 30 il Ermənistan-Azərbaycan münaqişəsi kontekstində beynəlxalq humanitar hüquqa uyğun olaraq itkin düşmüş şəxslərimizin taleyini müəyyən etməli olan Beynəlxalq Qızıl Xaç Komitəsi kimi təsisatların fəaliyyətini qənaətbəxş hesab etmir”.

Prezident Administrasiyasının Xarici siyasət məsələləri şöbəsinin müdiri Hikmət Hacıyev 30 Avqust – Beynəlxalq İtkin Düşmüş Şəxslər Günü ilə bağlı “X” hesabında paylaşımında belə yazıb.

“Əfsuslar olsun ki, bu gün BQXK öz nizamnaməsinə və beynəlxalq humanitar hüquqa zidd olaraq Ermənistanın pullu sifarişi ilə hesabat yazan şəxslərə yalan məlumat ötürməklə məşğul olur və qərəzli anti-Azərbaycan təbliğat kampaniyasında yer alır. Azərbaycan dövləti öz itkin düşmüş şəxslərinin taleyinin müəyyənləşdirilməsi üçün bundan sonra da əlindən gələni əsirgəməyəcək, onların ailələrinin həsrət və iztirablarına son qoymaq üçün bu xüsusda tədbirlərini davam etdirəcək”, – deyə Hikmət Hacıyev qeyd edib.

Prezident Administrasiyasının şöbə müdiri həmçinin vurğulayıb ki, Ermənistan öz vəhşi əməllərinə görə Azərbaycandan üzr istəməli, digər günahkarları özü məsuliyyətə cəlb etməli və kütləvi məzarlıqların, o cümlədən Azərbaycanın Milli Qəhrəmanı Natiq Qasımovun qalıqlarının dəqiq yerini bildirməlidir.