İtkin düşən şəhid Ağdamda son mənzilə yola salındı | Dəfndən görüntülər

Birinci Qarabağ müharibəsində itkin düşdüyü hesab edilən və şəxsiyyəti müəyyən olunan Zahid Nağıyevin nəşinin qalıqları ailəsinə təhvil verilib.

Ağdamın Qaradağlı kənd qəbiristanlığında şəhidlə vida mərasimi keçirilib.

“Mən fəxr edirəm ki, əmim Vətən uğrunda şəhid olub. 30 ildir itkin düşmüşdü, bu gün nəşi tapılıb. Öz elində, obasında dəfn olunub”, –şəhidin qardaşı oğlu deyib.

Qeyd edək ki, Zahid Nağıyev Birinci Qarabağ müharibəsində Füzuli və Ağdam istiqamətlərində vuruşub. 1994-cü ilin aprelin 18-də Ağdamın Cəvahirli kəndi uğrunda gedən döyüşdə itkin düşmüş hesab olunurdu. Aparılan araşdırmalardan sonra hərbçinin Ağdamın Xındırıstan kənd qəbiristanlığında naməlum şəhid kimi dəfn olunduğu məlum olub.