Jurnalistlər innovasiya şəhərciyində həyata keçirilən layihələrlə tanış olublar - Baku TV

Sentyabrın 15-də "SABAH.city" innovasiya şəhərciyinə mediatur təşkil olunub.

Mediatur çərçivəsində jurnalistlər innovasiya şəhərciyi, burada yaradılan imkanlar və həyata keçirilən layihələrlə yaxından tanış olublar.

"SABAH.city"də tədris və tədqiqat sahələri, startaplar üçün “kovorkinq” məkanları, texnologiya şirkətləri üçün ofislər, 200 nəfərlik tədbir zalı, restoran və “kofeşop”lar, həmçinin idman və istirahət zonaları yaradılıb. Birinci mərhələdə 3 ali təhsil müəssisəsi, 8 texnologiya və innovasiyayönümlü şirkət və 12 startap olmaqla ümumilikdə 23 əsas ekosistem iştirakçısı şəhərciyə cəlb edilib.

Mediaturda həmçinin ASAN Süni İntellekt Mərkəzinin fəaliyyəti barədə məlumat verilib. Bildirilib ki, mərkəzin əsas məqsədi Azərbaycanda süni intellekt sahəsində innovativ təşəbbüsləri dəstəkləmək, tədqiqatçıları, dövlət qurumlarını, özəl sektoru və fərdi istifadəçiləri vahid rəqəmsal platformada bir araya gətirməkdir.

Qeyd edək ki, Prezident İlham Əliyev sentyabrın 14-də Bakıda Elm və Təhsil Nazirliyinin Yüksək Texnologiyalar Parkında qurulan "SABAH.city" innovasiya şəhərciyinin birinci mərhələsinin açılışında iştirak edib. Layihənin əsas məqsədi universitet-sənaye əməkdaşlığını gücləndirmək, yüksəkixtisaslı insan kapitalının inkişafına dəstək olmaq, tətbiqi tədqiqatları və texnologiya transferini təşviq etmək, startap və texnologiya şirkətləri üçün əlverişli mühit yaratmaqdır.