Kişi döyülürsə, günah özündədir... | Qadınlar niyə aqressivləşib?

Son illər xanımlar tərəfindən fiziki və psixoloji zorakılığa məruz qalan kişilərlə bağlı xəbərlərin çoxaldığı müşahidə edilir. Bir neçə gün əvvəl Nərimanov rayonunda 52 yaşlı kişi həyat yoldaşı tərəfindən döyülərək kəllə-beyin travması alıb. Əvvəlki illərdə də xanımlar tərəfindən fiziki şiddətə məruz qalan kişilər olub.

Bəs xanımları şiddətə yönəldən hansı amillərdir? Paytaxt sakinlərinin bu yöndə fikirləri müxtəlifdir.

“Günümüzdə kişilərin əksəriyyəti döyülür də, söyülür də. Çünki qadın hüquqları deyə-deyə kişilərin hüquqlarını unutmuşuq”, ‒ sakinlərdən biri söyləyib.

“Ola bilsin ki, zəmanəmiz belə tələb edir. Günah döyülən, söyülən insanın özündədir. Xanımlara toxunmaq olmaz”, ‒ başqa bir sakin fikrini bildirib.

Bəs məişət zorakılığına məruz qalan kişilər üçün sığınacaqlar varmı? Şiddət görən kişilər hara sığınmalıdırlar?

Məsələ ilə bağlı Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyindən bildirilib ki, qurumun müvafiq müəssisəsində Məişət zorakılığından zərər çəkmiş şəxslərin sosial reabilitasiyası şöbəsi fəaliyyət göstərir.

Şöbədə məişət zorakılığı qurbanı və onun ailə üzvlərinin birgə yaşaması, mədəni və asudə vaxtının təşkili üçün müasir şərait yaradılıb. Hazırda şöbədə 15-i qadın, 2-si uşaq olmaqla 17 nəfərə müvafiq reabilitasiya xidmətləri göstərilir. Lakin ötən dövrdə şöbəyə kişi müraciəti daxil olmayıb.