Kürdəmir dəmir yolu stansiyasının fəaliyyəti bərpa edilib - Baku TV

Bakı ilə Kürdəmir arasında qatarla məsafə artıq cəmi 2 saat 11 dəqiqədir.

Pandemiya dövründə fəaliyyətində fasilə yaranan Kürdəmir dəmiryol stansiyası altı ildən sonra yenidən istifadəyə verilib. Bu dəfə isə daha müasir formada – dəmiryol şəbəkəsinin yenilənməsi çərçivəsində fəaliyyətə başlayıb.

Yenidən qurulan stansiya sərnişinlərə daha keyfiyyətli xidmət göstərilməsinə, təhlükəsiz nəqliyyat növü kimi dəmir yolundan istifadənin artmasına və nəticə etibarilə regionlar arasında əlaqələrin daha da güclənməsinə şərait yaradacaq.

“Azərbaycan Dəmir Yolları” QSC-nin Sərnişindaşımaları departamentinin rəisi Azər Fərəcov bildirib ki, 18 apreldən etibarən sərnişinlər artıq Kürdəmir stansiyasından istifadə edə biləcəklər.

Onun sözlərinə görə, sərnişinlər gündəlik Bakı–Qazax–Bakı istiqamətində 4 reys və Bakı–Balakən–Bakı istiqamətində 2 reys üzrə hərəkət edən qatarlardan istifadə edərək Kürdəmir stansiyasında enə bilərlər.

Bundan əlavə, həftə sonları fəaliyyət göstərən Bakı–Ağdam–Bakı və əlavə qatar olan Bakı–Ağstafa–Bakı marşrutları ilə də Kürdəmir stansiyasından istifadə mümkündür.