Kürdəmirdə küçədə yaşayan iki uşaqlı ailənin acınacaqlı vəziyyəti

Kürdəmirdə ikisi azyaşlı olmaqla 4 nəfərdən ibarət ailə bir aydan çoxdur ki, evləri olmadığından küçədə gecələyir.

Bu barədə Baku TV-nin qaynar xəttinə rayon sakinləri məlumat veriblər. Məlumat daxil olan kimi əməkdaşlar ailənin axtarışına çıxıb və onların gecələdiyi yerə baş çəkiblər.

Məlum olub ki, ailə gün ərzində dilənməklə öz tələbatlarını qarşılamağa çalışır. 4 nəfərdən ibarət ailənin başçısı isə əlildir, iki ayağını itirib.

“Balalarımı da götürüb bura gəldim. Elə gələn gündən bu günlərə düşmüşük. Havalar da soyuyub. Övladlarım xəstələnib, ailəmdə hamı öskürür. Mənim az yaşım yoxdur, 61 yaşım var. Mən nə vaxta kimi çöllərdə qalmalıyam? Yaşamaq istəyirəm, bir ev olsun, balalarımla, ailəm ilə bir tikə çörəyimizi yeyək”, – küçədə gecələyən ailə başçısı Kərəm Veysəlov deyib.

Ailənin acınacaqlı vəziyyəti ilə bağlı Sosial Xidmətlər Agentliyindən bildirilib ki, sözügedən ailənin yaşadığı əraziyə agentliyin əməkdaşları baxış keçiriblər:

“Ailə agentliyin müvafiq sığınacaqda yerləşmək təklifini qəbul etməyib. Əlavə olaraq ailənin hazırkı vəziyyətinin uşaqların sağlamlığı və həyatı üçün birbaşa təhlükəli olduğunu nəzərə alınaraq uşaqların ailədən alınıb müvafiq dövlət müəssisəsinə yerləşdirilməsu üçün yerli icra hakimiyyətinə müraciət ediləcək”.