Kurskda yaşayan tərtərli yoxa çıxdı | Azərbaycanlılar barədə təcili açıqlama

Ukrayna qoşunlarının Rusiyanın Kursk vilayətinə daxil olması və son günlərdə irəliləməsi ilə nəticələnən hərbi əməliyyatlar zamanı zərərçəkənlər arasında rusiyalılarla yanaşı, uzun illərdir orada yaşayan azərbaycanlılar da var.

Bu barədə Baku TV-yə Kursk vilayətinin Azərbaycan İcmasının rəhbəri Qasım Kərimov məlumat verib.

Bildirib ki, döyüşlər zamanı itkin düşənlər arasında bir soydaşımız da var. Onun Ukrayna hərbçilərinə əsir düşdüyü ehtimal edilir.

“Ayın 6-dan başlamış hərbi əməliyyatlara görə çoxlu sayda evini tərk etmiş insanlar var ki, onlardan bəziləri azərbaycanlılardır. Bizə müxtəlif yollarla müraciət ediblər, onlara humanitar yardım edirik. Vəsait toplamışıq, eyni zamanda yüklər də gəlir.

Əslən Tərtərli olan və yaşı 60-a yaxın olan 1 nəfər hazırda itkin düşüb. Deyilənə görə, girov aparıblar. Rus ordusunda xidmət edən, əslən Hacıqabuldan olan azərbaycanlı əsgər isə əsir düşüb”, – deyə Q.Kərimov bildirib.

Kursk vilayətinin Azərbaycan İcmasının rəhbəri Qasım Kərimov onu da bildirib ki, Ukrayna hərbçilərinin daxil olduğu kəndlərdən təxliyə edilənlər arasında azərbaycanlılar var.

O həmçinin qeyd edib ki, zərərçəkənlərə Rusiyanın digər şəhərlərindən olan icma rəhbərləri və diaspor nümayəndələri də maddi və mənəvi yardımlarını əsirgəmirlər.