Kuryerlik edib, anasına baxan 22 yaşlı Aminin acı sonu | "Balamı zülmlə böyütmüşdüm" - ARZUNUN VAXTI

“Arzunun vaxtı” verilişinin budəfəki buraxılışında motosiklet qəzasında həyatını itirən 22 yaşlı Amin Cəfərovun anası Amirə Cəfərova oğlunun ölümündən sonra yaşadığı ağır günlərdən danışıb.

Amirə Cəfərova Aminin kuryer kimi çalışdığını, uşaqlıqdan idmanla məşğul olduğunu və ona dəstək olmaq üçün işlədiyini bildirib.

Ana oğlunun ölümündən bir gün əvvəl yaşadığı hadisəni belə xatırlayıb:

“Evə gəldim, birbaşa otağına keçdim. O qədər darıxmışdım ki, dedim bir dəfə görüm, qucaqlayım. Gördüm ki, xoşbəxt yatıb. Əyildim, iki dəfə üzündən öpdüm. Kaş ki, oyadardım, bağrıma basardım, deyərdim ki, Amin, dur, sənə qurban olum, darıxmışam”.

Amirə Cəfərova oğlunun ölüm xəbərini evdə olarkən aldığını deyib. Əvvəlcə Aminin qəza keçirdiyi bildirilib, daha sonra isə yolda onun həyatını itirdiyini öyrənib.

Qadın hazırda kirayədə tək yaşadığını və oğlunun ölümündən sonra işləmədiyini bildirib. O, oğlunun yoxluğunu hələ də qəbul edə bilmədiyini deyib:

“Hələ də inanmıram. Elə bilirəm ki, Amin haradadırsa, gələcək. Burada yatdığını qəbul edə bilmirəm. Mənim hər şeyim idi. Bütün ümidlərim, xəyallarım, arzularım idi”.