“Qəssab 10 dəfə çox sata bilər?” | Heyvanların kəsimində yenilik | Subsidiya verilsə də... - Baku TV

Heyvanların erkən yaşda və aşağı çəkidə kəsilməsinin qarşısının alınması planlaşdırılır.

Bu məsələ “Azərbaycan Respublikasında qida təhlükəsizliyinin təmin edilməsinə dair 2027-2032-ci illər üçün Dövlət Proqramı”nda əksini tapıb.

Sənədə əsasən, ilk növbədə, heyvanların erkən yaşda və aşağı çəkidə kəsilməsinin səbəbi araşdırılacaq. Heyvanların növü, cinsi və məhsuldarlıq xüsusiyyətləri nəzərə alınmaqla müvafiq normativ tələblər hazırlanacaq.

İqtisadçı ekspertlər isə hesab edirlər ki, erkən kəsimin qarşısını qadağalar yerinə subsidiyalarla almaq daha məqsədəuyğundur. Məsələn, Aqrar Subsidiya Şurasının qərarı ilə Azərbaycanda intensiv kökəltmə təsərrüfatlarının inkişafı və heyvanların daha yüksək çəkidə kəsiminin təşviqi məqsədilə diri çəkisi 600 kiloqram və daha çox olan iribuynuzlu heyvanlara görə hər kiloqram diri çəki üzrə 40 qəpik məhsul subsidiyası veriləcək.

Fermerlər isə hesab edirlər ki, heyvanların çox erkən və aşağı çəkidə kəsilməsi məhsuldarlığın zəifləməsinə və ət qıtlığının yaranmasına səbəb olur.

Fermer Habil İbrahimov mövzu ilə bağlı fikirlərini bölüşüb.

“13–14 ay saxlanılmış cins ətlik heyvan bu müddətdə 300–320 kiloqram təmiz ət verirsə, yerli heyvan eyni xərc qarşılığında cəmi 260–270 kiloqram ət yığa bilir. Bu da o deməkdir ki, ilk növbədə, heyvanların cins tərkibi dəyişdirilməlidir. Əsas məqsəd heyvanların baş sayını artırmaq deyil, onların keyfiyyətini və məhsuldarlıq göstəricilərini yaxşılaşdırmaq olmalıdır”, – deyə o qeyd edib.