Laçın yolundakı aksiya Bolqarıstan mətbuatında

Bolqarıstanın bir sıra aparıcı mətbuat orqanları və xəbər portallarında Laçın yolundakı aksiyaya dair geniş məlumatlar yayılıb.

Bu barədə Azərbaycanın Bolqarıstandakı səfirliyindən bildirilib. Dərc olunan yazılarda Şuşa-Laçın yolunda baş verən etiraz aksiyasının Azərbaycanın ərazilərində aparılan qeyri-qanuni fəaliyyətlərə qarşı Azərbaycan ictimaiyyətinin haqlı narazılığının nəticəsi olduğu qeyd olunub.

Məlumatlarda sülhməramlı kontingentin komandanlığı ilə əldə olunan razılığa baxmayaraq, 10 dekabr tarixində sözügedən ərazilərə Azərbaycan nümayəndələrinin monitorinq aparmasına maneələr törədildiyi bildirilib. Xüsusən, Ermənistanın 10 noyabr 2020-ci il tarixli üçtərəfli bəyanatın müddəalarına zidd Laçın yolundan hərbi məqsədlər, minaların ötürülməsi və diversant qrupların göndərilməsi üçün sui-istifadə edilməsi diqqətə çatdırılıb. 2020-ci ildə Vətən müharibəsinin başa çatmasından etibarən bu günədək 276 vətəndaşımızın mina partlayışından zərər çəkdiyi, həlak olan 46 nəfərdən 35 nəfərin mülki şəxs olduğu vurğulanıb.

Təbii sərvətlərin qeyri-qanuni istismarının Azərbaycanın milli qanunvericiliyi və müvafiq beynəlxalq sənədlərə əsasən yolverilməz olmasına dair məlumatlar dərc olunub. Həmçinin ətraf mühitlə bağlı müvafiq standartlara tamamilə məhəl qoyulmadan təbii sərvətlərin istismar edildiyi, bununla da ekoloji sistemə ciddi və bərpa olunmaz ziyan vurulduğu da bolqar oxucuların diqqətinə çatdırılıb.