Masallıda aprel şəhidinin xatirəsi anıldı

3 il əvvəl aprel döyüşləri zamanı şəhid olan Firdovsi Bağırzadənin xatirəsi Masallı rayonunun Güllütəpə kəndində yad edilib.

Şəhidin doğulduğu Güllütəpə kəndində keçirilən anım mərasimində rayon icra hakimiyyətinin, təhsil şöbəsinin nümayəndələri, Milli Məclisin deputatı Musa Qasımlı, şəhidin doğmaları, rayon ictimaiyyətinin nümayəndələri iştirak ediblər. Güllütəpə kənd tam orta məktəbində keçirilən anım mərasimdə Azərbaycanın müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad olunub. Tədbirdə çıxış edənlər şəhidin göstərdiyi qəhrəmanlıqdan, onun vətən sevgisindən danışıblar. Bildirilib ki, şəhid Firdovsi Bağırzadə 1996-cı ildə anadan olub. 2014-cü ilin oktyabr ayında hərbi xidmətə çağırılıb. 2016-cı ildə aprelin 2-dən 3-nə keçən gecə isə cəbhənin Tərtər rayonu istiqamətindəki təmas xəttində gedən gərgin döyüşlərdə qəhrəmancasına şəhid olub.

Sonra kənd qəbiristanlığında şəhidin məzarı ziyarət edilib, önünə gül dəstələri qoyulub. Mərasim iştirakçıları Firdovsi Bağırzadənin ev muzeyi ilə tanış olublar.

Şəhid Firdovsi Bağırzadə göstərdiyi qəhrəmanlığa görə ölümündən sonra Azərbaycan Respublikasının Prezidenti İlham Əliyevin sərəncamı ilə "Hərbi xidmətdə fərqlənməyə görə" III dərəcəli medalı ilə təltif edilib.

Masallının Güllütəpə kəndindəki mərkəzi küçəyə şəhid Firdovsi Bağırzadənin adı verilib.

Rövşən Əzimov