Meymunçiçəyi virusunun əlamətləri açıqlandı | Səhiyyə Nazirliyi məlumat yaydı

Meymunçiçəyi virusunun laborator müayinəsi üçün Azərbaycana testlər və xəstəliyə qarşı lazımi dərman preparatları gətirilib.

Bu barədə Səhiyyə Nazirliyinin mütəxəssis-eksperti, infeksionist Təyyar Eyvazov məlumat verib.

Qeyd edilib ki, ölkəmizdə "Mpox" (meymunçiçəyi) infeksiyasına yoluxma halları qeydə alınmayıb. İnfeksiyanın yayılmaması məqsədilə bütün ilkin profilaktik tədbirlər icra olunur.

Təyyar Eyvazov əlavə edib ki, meymunçiçəyi virusuna qarşı vaksinlər az miqdarda istehsal olunur.

İnfeksionist bildirib ki, meymunçiçəyi heyvanlardan insanlara keçən virusdur, əlamətləri təbii çiçək xəstəliyinə oxşardır, lakin kliniki olaraq daha yüngül keçir. Virusun ötürülməsi xəstə heyvan, insan və ya virusla çirklənmiş materiallarla təmas yolu ilə baş verir.

Virusun gizli dövrü adətən 5-21 gündür. 5 günədək davam edə bilən başlanğıc dövrdə qızdırma, şiddətli baş ağrısı, limfa düyünlərinin böyüməsi, bel və əzələ ağrıları, bəzən kataral və mədə-bağırsaq əlamətlərinə rast gəlinir. Qızdırmadan 1-3 gün sonra təbii çiçəyi xatırladan xarakterik qovucuqlu səpkilər yaranır.