Mikoplazma pnevmoniyasının simptomları açıqlandı | Kimlər yoluxa bilər?

Sosial əlaqələrin məhdudlaşdırılması, otaqların havalandırılması, əllərin təmizliyi və maska taxılması mikoplazma pnevmoniyasına yoluxma riskini azaltmağa kömək edə bilər.

Rusiyalı immunoloq Nikolay Kryuçkov bildirib ki, mikoplazma pnevmoniyasına həm böyüklər, həm də uşaqlar yoluxa bilərlər.

Onun sözlərinə görə, simptomlar əsasən kəskin respirator virus infeksiyalarına (KRVİ) bənzəyir – yüngül hərarət, öskürək, ümumi zəiflik. Daha ağır hallarda isə təngnəfəslik, dərinin göyərməsi, daha güclü zəiflik və yüksək hərarət müşahidə edilə bilər.

Həkim vurğulayıb ki, mikoplazma pnevmoniyasından qoruyan peyvənd mövcud deyil. Lakin ümumi ehtiyat tədbirlərinə əməl etməklə yoluxma riskini minimuma endirmək mümkündür.

Sosial əlaqələrin məhdudlaşdırılması, otaqların havalandırılması, əllərin təmizliyi və maska taxılması – bütün bu tədbirlər birlikdə effektiv işləyir. Bu yolla öz riskinizi əhəmiyyətli dərəcədə azalda bilərsiniz. Yoluxma halları artdıqda isə yayılmanın qarşısını almaq üçün yerli karantin tədbirlərinin tətbiqi məsləhət görülür.