Moldova azərbaycanlıları hansı durumdadır?

Son vaxtlar yeni siyasi kursuna və qonşu Ukraynada gedən müharibə səbəbindən strateji əhəmiyyətinə görə dünyanın gündəminə çevrilən Moldovada yaşayan azərbaycanlıların sayı az deyil.

Bir ildən artıqdır davam edən müharibənin ilk günlərindən Ukraynanı tərk edən çoxsaylı azərbaycanlıların əksəriyyəti məhz Moldovadan keçərək Azərbaycana və Avropaya pənah aparıb. Onların müharibənin dəhşətlərindən xilas olunmasına bu ölkədə yaşayan müxtəlif peşə sahibi həmyerlilərimiz böyük dəstək göstəriblər. Ərazicə kiçik, amma strateji cəhətdən əhəmiyyətli olan Moldovada azərbaycanlıların fəallığı günü-gündən artır.

Moldova rəsmiləri və ictimai fəalları da azərbaycanlıların fəaliyyətini qiymətləndirirlər. Ölkənin hakim Hərəkat və Həmrəylik Partiyasından deputat Vitalie Jakot bildirir ki, onların partiyası seçkili orqanlarda iştirak etmək üçün digər etnik qruplar kimi, azərbaycanlıların da üzünə açıqdır. Sadəcə, özlərindən təşəbbüs lazımdır.

Qeyd edək ki, son vaxtlar Ukraynada gedən müharibə səbəbindən Moldovaya daha çox təhsil arxasınca gələn azərbaycanlı tələbələrin sayı artıb.