Nabranın sahilyanı ərazilərində təmizlik aksiyası təşkil edildi | Qurum nümayəndələri iştirak etdi

Qarşıdan gələn yay mövsümünə hazırlıq məqsədilə Nabranda yerləşən çimərlik ərazilərində Xaçmaz Rayon İcra Hakimiyyətinin təşkilatçılığı ilə təmizlik aksiyası təşkil edilib.

Aksiyada Xaçmaz Rayon İcra Hakimiyyətinin başçısı Elnur Rzayev, yerli hüquq-mühafizə orqanlarının rəhbərləri, idarə, müəssisə və təşkilatların kollektivləri, yerli icra nümayəndələri, bələdiyyələr, eləcə də gənc könüllülər iştirak ediblər. İməcilik zamanı sahilyanı ərazilər plastik qablardan və digər tullantılardan təmizlənib.

Aksiyanın keçirilməsində məqsəd sahilyanı ərazilərin daimi təmizliyini təmin etmək, təbiət ərazilərində əhali tərəfindən təmizliyə riayət olunmasını təbliğ və təşviq etmək, müəyyən olunmayan ərazilərə məişət tullantılarının atılmasının qarşısını almaq və ictimaiyyəti ətraf mühitin mühafizəsi sahəsində mübarizəyə cəlb etməkdir.

Çimərlik mövsümünün başlamasına az qalmış belə təmizlik aksiyalarının təşkili sakinlər tərəfindən razılıqla qarşılanıb.