Narkotik satdığı iddia olunan gəncin dəhşətli sonu | Məhkəmədə detallar açıqlandı

Bakıda qətl törətməkdə təqsirləndirilən paytaxt sakinləri – Əli Eybatov, Emin Ələsgərov və Fərrux Qasımovun cinayət işinin növbəti məhkəmə baxışı keçirilib.

Bakı Ağır Cinayətlər Məhkəməsinin hakimi Leyla Əsgərova-Məmmədovanın sədrliyi ilə keçirilən iclasda şahidlərin ifadələri dinlənilib.

Təqsirləndirilən Əli Eybatov bundan əvvəlki prosesdə hadisəni tək törətdiyini və onunla yanaşı məsuliyyətə cəlb olunan digər iki şəxsin – Emin Ələskərov və Fərrux Qasımovun günahsız olduğunu vurğulayıb. Məhkəmədə ifadə verən şahidlər isə Emin Ələsgərov və Fərrux Qasımovun hadisə yerində iştirak etdiklərini təsdiqləyiblər. Bu, hadisə zamanı lentə alınan kamera görüntülərində də öz əksini tapıb.

Hadisənin baş vermə səbəbinə gəlincə isə Əli Eybatov bildirib ki, buna səbəb qətlə yetirilən Səbuhi Əhmədlinin yaşadığı ərazidə narkotik maddə satmaqda adının hallanması olub.

Təqsirləndirilənin iddiasına əsasən, o, buna görə hətta Səbuhi Əhmədliyə bir neçə dəfə irad tutaraq öz əməli ilə gəncləri zəhərləməməyi tövsiyə edib. Qarşı tərəf isə buna əhəmiyyət verməyərək əməlini davam etdirib.

Məhkəmədə ifadə verən və Səbuhi Əhmədlini tanıyan şahidlər də onun adının narkotik vasitələrin satışında hallandığının dəfələrlə şahidi olduqlarını təsdiqləyiblər.

Məhkəmənin növbəti iclası dekabrın 3-nə təyin edilib.