Nazir Emin Əmrullayev təhsil festivalında

Astarada ümummilli lider Heydər Əliyevin 100 illiyi ilə əlaqədar Elm və Təhsil Nazirliyinin Lənkəran-Astara Regional Təhsil İdarəsi, Astara Rayon İcra Hakimiyyəti, Lənkəran Rayon Mədəniyyət İdarəsi, Lənkəran Dövlət Peşə Təhsil Mərkəzinin təşkilatçılığı ilə təhsil festivalı keçirilib.

Rayonun Dənizkənarı Park-Bulvar kompleksində təşkil olunan festivala 5 minə yaxın iştirakçı qatılıb.

Tədbirin keçirilməsində əsas məqsəd özəl sektor və ölkə üzrə təhsilin inkişafı üçün digər maraqlı tərəflər arasında regionda əməkdaşlıq platformasının yaradılmasına dəstək verməkdir.

Festivalın açılışında elm və təhsil naziri Emin Əmrullayev, ictimai arenada tanınmış şəxslər, ziyalılar və rayon ictimaiyyətinin nümayəndələri iştirak edib, universitetlər, ümumtəhsil müəssisələri, peşə məktəbləri, bağçalar və məktəblərdə müxtəlif layihələr üzrə təqdimatlar keçirilib. Kitab sərgisi, icma və məktəbəqədər təhsil müəssisələrinin, şagirdlərin ifasında tamaşa və musiqilər də festivala xüsusi rəng qatıb.

Festival boyunca iştirakçılar maraqlı məlumatlar əldə edib, şagirdlərin rəsm işləri ilə tanış olublar. Həmçinin ümumtəhsil müəssisələrinin məzunlarının düzgün ixtisas seçiminə dəstək, təhsil tələbə kreditləri ilə bağlı da məlumatlandırılıblar. Festival gün boyu davam edib.