Nənələr çəkilişdə dalaşdı | İlk dərsin qəbiristanlıqda keçirildiyi kənd - KƏNDİNƏ QAYIT

“Kəndinə qayıt” verilişinin yeni buraxılışında haputluların yaşadığı İsmayıllı rayonuna səfər olunub.

Qafqaz xalqlarının Nax-Dağıstan qrupunun Şahdağ yarımqrupuna aid olan haputlar bölgənin qədim etnoslarındandır. Azərbaycanda 5 mindən çox haputlu yaşayır, onlar “haputlar”, “haputlular” və ya “hapıtlar” adları ilə tanınır.

Aparıcı Kəmalə Bədəlova səfər zamanı haputların kompakt məskunlaşdığı Hacıhətəmli və Mollaisaqlı kəndlərində olub.

Qeyd edilib ki, Hacıhətəmlidə 2500 nəfərə yaxın əhali yaşayır, onların çoxu haputlardır. Burada üç əsas tayfa mövcuddur: çoçanlılar, izbaşlılar və çühürlülər.

Verilişdə kəndin “Şəhidlər xiyabanı” da ziyarət olunub. Jurnalist Xeyrulla Ağayevin sözlərinə görə, burada 1918-ci il hadisələri, Böyük Vətən müharibəsi və Qarabağ müharibələrində həlak olmuş şəxslərin adları qeyd olunub. 1918-ci ildə iki türk əsgərinin dəfnindən sonra kənd qəbiristanlığının həmin əraziyə köçürülməsi yeni bir ənənə yaradıb.

Belə ki, uzun illərdir sentyabrın 15-i şagirdlər dərslərə məhz burada başlayır, onlara qəhrəmanlıq və azadlıq mübarizəsi haqqında danışılır.

Mollaisaqlıda isə 1092 nəfər haputlunun yaşadığı bildirilib. Sakinlərin sözlərinə görə, kənddə indiyədək nə boşanma, nə də cinayət hadisəsi baş verməyib.