Novruzu gürcülər və azərbaycanlılar birlikdə qeyd edib

Novruz bayramının İlaxır çərşənbəsi qonşu Gürcüstanda da qeyd edilib.

İlk dəfə olaraq paytaxt Tbilisidəki M.F.Axundzadə adına Azərbaycan Mədəniyyəti Muzeyinin həyətində bayram şənliyi təşkil olunub.

Şənlikdə Tbilisi bələdiyyəsinin sədri, şəhər meriyasının nümayəndələri, eləcə də digər rəsmi şəxslər, ölkəmizin Gürcüstandakı fövqəladə və səlahiyyətli səfiri, həmçinin Azərbaycan və gürcü ictimaiyyətinin nümayəndələri və şəhər sakinləri iştirak ediblər.

Öncə tədbir iştirakçılarına Novruz bayramı haqqında məlumat verilib. Sonra bayram tonqalı alovlandırılıb. Novruzun atributlarından olan kosa və keçəl rəqs edib, yumurta döyüşdürüblər. Bayram şənliyində çıxış edənlər Azərbaycan xalqını Novruz bayramı münasibətilə təbrik edərək, bu şənliyi iki qonşu xalqın birgə qeyd etməsindən danışıblar.

Bayram şənliyində Azərbaycan və Gürcüstanın milli rəqsləri, eləcə də musiqiləri ifa edilib.