Onkoloji xəstələrə yardım adı ilə yığdıqları pulu oğurladı

Sosial şəbəkələrdə onkoloji xəstəlikdən əziyyət çəkən şəxslərə yardım məqsədilə paylaşılan bank kartlarından kibercinayətkarlıq metodlarından istifadə edərək oğurluqlar edən şəxs saxlanılıb. Bu barədə Daxili İşlər Nazirliyindən məlumat verilib.

Bildirilib ki, nazirliyə onkoloji xəstəlikdən əziyyət çəkən və aztəminatlı şəxslərə yardım məqsədilə yerləşdirilən elanlarda göstərilən bank kartlarına müdaxilə olunduğu barədə çoxsaylı müraciətlər edilib. Həmçinin həmin hesablarda olan pulların informasiya texnologiyalarının imkanlarından istifadə edilməklə ələ keçirildiyi bildirilib.

Araşdırmalar və həyata keçirilən əməliyyat-texniki tədbirlər nəticəsində kibercinayətkarlıq metodlarından istifadə edərək qeyd edilən qanunsuz əməlləri törədən Aslan Qurbanov saxlanılaraq istintaqa cəlb edilib.

Müəyyən olunub ki, o, onkoloji xəstələrin maddi yardım toplanması üçün müxtəlif sosial şəbəkələrdə paylaşdığı bank kartlarının məlumatlarını götürərək həmin şəxslərlə xarici virtual nömrələr vasitəsilə əlaqə saxlayıb. Aslan Qurbanov həmin şəxsləri onlara yardım edəcəyi adı ilə aldadaraq bank kartlarının məxfi məlumatlarını əldə edib.

O, ələ keçirdiyi pul vəsaitlərini izi itirmək məqsədilə əvvəlcə xaricdə olan idman-mərc oyunlarındakı hesablarına transfer edib. Sonradan pulları istifadəsində olan bank kartına köçürərək nağdlaşdırıb. Faktla bağlı cinayət işi başlanılıb.