Pensiya xərclərinə təsir göstərən amillər | Vüqar Bayramov detalları açıqladı

"Dövlət Sosial Müdafiə Fondunun məlumatına görə, bu ilin ilk 7 ayında pensiya ödənişlərinə ötən ilin uyğun dövrü ilə müqayisədə 10 faiz çox vəsait ayrılıb. Bu o deməkdir ki, 367 milyon manat çox olmaqla həmin müddətdə pensiyaların verilməsinə 4 milyard 142 milyon manat xərclənib".

Bu barədə iqtisadçı-deputat Vüqar Bayramov məlumat verib.

Deputat pensiya ödənişlərindəki artımın daha çox 2025-ci ildə 5-ci sosial paketin tətbiqi ilə bağlı olduğunu bildirib.

"Belə ki, sosial paket çərçivəsində bu ilin əvvəlindən etibarən bütün növ əmək pensiyaları 8,1 faiz indeksləşdirilərək artırılıb. Eyni zamanda bu ilin fevralın 1-dən minimum pensiya 14,3 faiz artımla 320 manata çatdırılıb. Bunlar isə pensiya xərclərinə birbaşa təsir göstərib.

Pensiya artımları 1,1 milyon vətəndaşımızı əhatə edib. Bu baxımdan bu qərarlar ümumi pensiya ayırmalarının artmasına səbəb olub.

Digər tərəfdən, bu ilin geridə qalan aylarında pensiya təyinatları da davam etdirilib. Həmin müddətdə 27 min pensiya təyinatı e-sistem üzərindən proaktiv qaydada həyata keçirilib”, ‒ millət vəkili əlavə edib.