Pensiyaların artımı ilə bağlı rəsmi açıqlama

Azərbaycanda pensiyaların artırılması qanunvericiliklə hər il yanvarın 1-i tarixində, ondan əvvəlki il üzrə muzdla çalışanların orta aylıq əməkhaqqının illik artımına uyğun olaraq həyata keçirilir. Yəni əvvəlki il əməkhaqları rəsmi olaraq nə qədər artıbsa, növbəti il bütün növ pensiyalar da o qədər artırılır.

Dövlət Statistika Komitəsinin məlumatına görə, bu ilin birinci yarısında orta aylıq əməkhaqqı 11,5 faiz artıb. İlin sonuna kimi bu göstəricinin dəyişməsindən asılı olaraq pensiyalardakı artım müəyyən olunacaq. Ancaq əvvəlki illərin təcrübəsi onu göstərir ki, əməkhaqlarının artımı daha çox ilin birinci yarısında olur. İlin sonuna doğru ciddi dəyişiklik baş vermir. Bu da o deməkdir ki, 2024-cü ildə pensiyalar 12 faiz ətrafında arta bilər.

İşləyənlərin pensiya kapitalı isə əvvəlki ilin orta illik inflyasiya səviyyəsinə uyğunlaşdırılır. 2023-cü ildə inflyasiyanın 10 faiz səviyyəsində olacağının proqnozlaşdırıldığını nəzərə alsaq, pensiya kapitalının da bu həddə artacağı gözlənilir.