Plastik cərrahlar barədə qərar | Azərbaycanda kimlər işləyə biləcək?

Azərbaycanda plastik cərrah kimi fəaliyyət göstərəcək həkimlərin adları bəlli olub.

Səhiyyə Nazirliyinin məlumatına əsasən, praktik tibb fəaliyyəti ilə məşğul olan plastik cərrahların peşə fəaliyyətinin qanuni əsaslarının kompleks şəkildə yoxlanılması məqsədilə Xüsusi Təftiş Komissiyası yaradılıb.

Komissiyanın tərkib hissəsi Səhiyyə Nazirliyi, Baş Prokurorluq, Daxili İşlər Nazirliyi və Elm və Təhsil Nazirliyinin səlahiyyətli nümayəndələrindən ibarətdir. Komissiyanın ümumilikdə 11 iclası keçirilib və əvvəlcədən xəbərdarlıq edilməklə iclasların video, audioçəkilişləri aparılıb və hər bir iclas protokollaşdırılıb.

Xüsusi Təftiş Komissiyasının müvafiq qərarı ilə sənədlərinin əsaslılığı təsdiq olunan “Azərbaycan Respublikasının ərazisində plastik cərrahiyyə ixtisası üzrə praktik tibb fəaliyyətinə icazə verilən həkim-mütəxəssislərin Siyahısı” tərtib olunaraq linkdə yerləşdirilib.

Qeyd olunan linkdə göstərilən siyahı 17 aprel 2025-ci il tarixinə olan məlumatları özündə əks etdirir. Tibb mütəxəssislərinin plastik cərrahiyyə ixtisası üzrə praktik tibb fəaliyyətinə icazə verən yeni hüquqi əsaslar olduğu halda sözügedən siyahı mütəmadi yenilənəcək.

Bununla yanaşı, Səhiyyə Nazirliyinin müvafiq əmri ilə “Cərrahiyyə profili üzrə digər peşə ixtisas sahibləri tərəfindən ali ixtisas tibb təhsilinin tədris proqramlarına uyğun olaraq icrasına icazə verilən plastik cərrahiyyə sahəsinə aid əməliyyatların Siyahısı” təsdiq edilib.