Prezident və birinci xanım taekvondo üzrə 26-cı dünya çempionatının açılışında

Taekvondo üzrə dünya çempionatının açılışını izləmək üçün Prezident İlham Əiyev və Birinci vitse-prezident Mehriban Əliyeva “Baku Crystal Hall”a gəliblər.

Əvvəlcə dövlət başçısı və birinci xanım Dünya Taekvondo Federasiyasının prezidenti Çunqvon Çu ilə görüşüblər.

Çunqvon Çu Mehriban Əliyevaya 8-ci dan Fəxri Qara kəmər və sertifikatını təqdim edib. Sonra dövlət başçısı və Birinci vitse-prezident Dünya Taekvondo Federasiyasının prezidenti ilə söhbət ediblər. Daha sonra taekvondo üzrə 26-cı dünya çempionatının açılış mərasimi keçirilib.

Açılış mərasimində əvvəlcə iştirakçı komandaların paradı olub. Dünya Taekvondo Federasiyasının himninin sədaları altında qurumun bayrağı səhnəyə gətirilib. Daha sonra Azərbaycan Respublikasının Dövlət Bayrağı səhnəyə gətirilib və Azərbaycan Respublikasının Dövlət Himni səsləndirilib.

Sonra hakimlər, idmançılar və məşqçilərin andiçmə mərasimi olub. Mərasimdə Dünya Taekvondo Federasiyasının prezidenti Çunqvon Çu çıxış edib. Daha sonra Beynəlxalq Olimpiya Komitəsinin prezidenti Tomas Baxın videosu nümayiş olunub.

Azərbaycan Taekvondo Federasiyasının prezidenti Kəmaləddin Heydərov çıxış edib. Sonra Azərbaycanın gənclər və idman naziri Fərid Qayıbov taekvondo üzrə 26-cı dünya çempionatını açıq elan edib. Açılış mərasimində ulu öndər Heydər Əliyevin həyat və fəaliyyəti, ümummilli liderin, İlham Əliyevin və Mehriban Əliyevanın ölkəmizdə idmanın inkişafına diqqət və qayğısını əks etdirən film nümayiş olunub. Dünya çempionatının açılış mərasimi bədii hissə ilə davam edib.