Qarabağ həqiqətlərini dünyaya çatdıran amerikalı jurnalist | Təsadüfi gəlişin dramatik sınağı

Baku TV Qarabağ həqiqətlərini dünyaya çatdıran amerikalı jurnalist Tomas Qoltz haqqında süjet hazırlayıb.

ADA Universitetinin prorektoru Fariz İsmayılzadə onunla bağlı xatirələrini bölüşərkən bildirib ki, Tomas Qoltz Kəlbəcəri son tərk edənlərdən biri olub:

“Kəlbəcər mühasirəyə alındı və avtomobil yolu ilə getmək mümkün olmadı. İnsanlar helikopterlərə mindilər, yerlər məhdud idi. Bir sıxlıq var idi. Əlbəttə ki, o bütün bunları lentə aldı və kitabının üz qabığında Kəlbəcərdən qalxan bu son helikopterin fotosunu yerləşdirdi. O da Kəlbəcəri son tərk edənlərdən biri idi. Tomas Qoltz dürüst bir insan idi. Düşündüyünü yazırdı. Azərbaycanın faciəsini vicdanla təsvir edirdi”.

Tomas Xocalı soyqırımının azsaylı xarici şahidlərindən biri olub. Baş verənlər onun qələmindən “The Washington Post” qəzetinin səhifələrində dərc olunur. Azərbaycanda yaşadıqlarından və gördüklərindən, dünyanın eşitmək istəmədiklərindən T.Qoltz sonralar özünün “Azərbaycan Gündəliyi”ndə yazır. Kitab 1998-ci ildə nəşr olunur.

Azərbaycan öz ərazilərini işğaldan azad edəndə o, artıq ağır xəstə idi və əlil arabasında hərəkət edirdi. Lakin amerikalı jurnalist azad edilmiş Qarabağa gəlməyə bilməzdi.

Tomas Qoltz azad Qarabağa səfərindən iki ay yarım sonra vəfat edir. Jurnalist küllərinin dünyanın üç müxtəlif nöqtəsinə səpməyi vəsiyyət edir. Bu siyahıda birinci yeri isə Azərbaycan tutub.