Qarabağa gəlincə siyasətə qarışmayan şirkət İsraili niyə dəstəklədi?

2020-ci ilin oktyabrında – Vətən müharibəsinin gedişində “McDonalds”ın Azərbaycandakı rəsmi səhifəsi Qarabağla bağlı Azərbaycana dəstək postu paylaşdı. Lakin üzərindən çox keçməmiş şirkət həmin postu sildi. Bunu da siyasətə qarışmamaq, əsas amallarının insanları qida ilə təmin etmək və xeyirxahlıq göstərmək olması ilə əlaqələndirdi.

Ancaq sonradan məlum oldu ki, “McDonalds”ın açıqlaması nə xeyirxahlıq, nə də siyasətdir. Səbəb xeyirxahlıq çətiri altında gizlənib, erməni lobbisinin diqtəsi ilə həqiqətə göz yummaqdır. Haqlı olaraq şirkətin bu addımı birmənalı qarşılanmadı və sosial şəbəkələrdə vətəndaşlar “McDonalds”ı boykot etməyə çağırdı.

Təbii ki, sözügedən qurum dediklərimizi təkzib edə və həmin açıqlamasının həqiqəti əks etdirdiyini deyə bilərdi, amma növbəti oxşar paylaşımı ilə özünü ifşa etməsəydi. Yəni, “McDonalds” yeni paylaşımı ilə sözü ilə əməlinin tərs mütənasib olduğunu elə özü sübut etdi. Oktyabrın 7-də İsraillə HƏMAS arasında başlayan qarşıdurmaya münasibət bildirməklə.

Belə ki, siyasətə qarışmadığını iddia edən şirkət hazırda HƏMAS-la müharibə şəraitində olan İsrailə rəsmi sosial şəbəkə hesabında dəstək nümayiş etdirib. Əgər şirkətin məqsədi həqiqətən də insanları yalnız qida ilə təmin etməkdirsə, Qarabağa dəstək paylaşımını məhz buna görə silmişdisə, bəs İsrailin istisnalıq təşkil etməsinə səbəb nədir?

Deməli, məqsəd sadəcə maraqların toqquşmasıdır. Bu isə istər sözügedən qurumun, istər ona təsir edən erməni lobbisinin, istərsə də onları dəstəkləyən qüvələrin nə qədər riyakar, saxtakar və insanlıq düşməni olduğunu bir daha nümayiş etdirir.