Qəhvənin müntəzəm qəbulu kofeinə qarşı dözümlülük formalaşdırır

"Qəhvə bəzi insanlarda arterial təzyiqin qısa müddətə yüksəlməsinə səbəb ola bilər".

Bu barədə rusiyalı kardioloq Denis Sokolov Lenta.ru-ya açıqlamasında bildirib.

Onun sözlərinə görə, belə reaksiya daha çox hipertoniya xəstələrində və kofeini nadir hallarda qəbul edən insanlarda müşahidə olunur.

Həkim qeyd edib ki, qəhvəni müntəzəm içən insanlarda zamanla kofeinə qarşı dözümlülük formalaşır. Bu halda içkidən sonra təzyiqdə kəskin artım daha nadir hallarda baş verir.

D.Sokolov əlavə edib ki, hətta sağlam insanlarda da tünd qəhvə qısamüddətli təzyiq artımına səbəb ola bilər. Lakin adətən bu təsir uzun çəkmir və müəyyən müddətdən sonra göstəricilər normaya qayıdır. Bundan başqa, orta dərəcədə qəhvə qəbulu qaraciyərin sağlamlığına müsbət təsir edir və qaraciyərin piylənmə riskini azaldır.

Amerikalı ekspertlərin fikrincə, qaraciyər orqanizmdə əsas rol oynayır, qanın süzülməsinə, qida maddələrinin emalına və saxlanmasına, zəhərli birləşmələrin, o cümlədən spirt və narkotiklərin çıxarılmasına cavabdehdir. Xroniki xəstəliklərin qarşısının alınması üçün onun sağlamlığının qorunması vacibdir.