Qubaya qar yağdı, hərəkət dayandı

Gecə saatlarından başlayaraq şimal rayonlarında hava şəraiti kəskin dəyişərək güclü qar yağmağa başlayıb. Qubada temperatur əvvəlki günlərlə müqayisədə 10-15 dərəcə aşağı enib.

Şəhər mərkəzində qarın hündürlüyü 8 sm təşkil edib. Güclü şaxta ilə müşayiət olunan yağıntı yolların buz bağlamasına səbəb olub. Bu da avtomobillərin hərəkətini çətinləşdirib.

Yaranmış vəziyyət sürücülər üçün çətinlik yaratsa da, sakinlər qarın yaratdığı mənzərənin onlarda yüksək əhvali-ruhiyyə yaratdığını bildiriblər.

Rayon ərazində ən çox yağıntı Xaltan kəndinə düşüb. Burada qarın hündürlüyü 11 sm-ə çatıb. Ən çox şaxta isə Qubanın Qrız kəndində olub, burada mənfi 16 dərəcə şaxta qeydə alınıb. Quba rayon “5 saylı Yol İstismarı” MMC-dən bildirilib ki, yollarda yaranan çətinliyin aradan qaldırılması üçün qurumun əməkdaşları və texnikaları ərazilərə cəlb edilib.