"Ailəmlə hədələdilər ki..." | Rusiyada saxlanılan azərbaycanlıların məhkəməsində nələr yaşandı?

2000-ci illərin əvvəllərində törədilmiş cinayətdə şübhəli bilinərək iyunun 27-də Yekaterinburqda güc tətbiq edilməklə saxlanılan doqquz azərbaycanlının məhkəmə prosesi başlayıb.

Yerli medianın yaydığı məlumata görə, məhkəmə onların barəsində həbs qətimkan tədbirinin seçilməsi məsələsinə baxır.

Qeyd edək ki, iyunun 27-də azərbaycanlıların yaşadığı 10-dan çox mənzildə keçirilmiş əməliyyat nəticəsində çoxsaylı şəxslər, o cümlədən Ağdam sakini olan Səfərovlar ailəsinin üzvləri saxlanılıb.

Əməliyyat nəticəsində iki qardaş – Ziyəddin və Hüseyn Səfərovlar öldürülüb, bir neçə nəfər xəstəxanaya yerləşdirilib.

İttiham tərəfi iclasın qapalı rejimdə keçirilməsini xahiş edib. Məhkəmə vəsatəti təmin edib, bundan sonra jurnalistlər zaldan çıxarılıb.

Saxlanılanların hər biri barəsində qətimkan tədbirinin seçilməsi məsələsinə ayrıca baxılır. Məzahir Səfərovun işi üzrə ittiham tərəfi həbs qətimkan tədbirinin seçilməsini tələb edib, vəkil isə ev dustaqlığında israr edib. M.Səfərov öz vəkilinə bildirib ki, etiraf güc tətbiq edilməklə və təzyiq altında, o cümlədən də ailəsinə qarşı hədələr vasitəsilə alınıb.