"Rusiya tərəfi dedi ki..." | Baş Prokuror Yekaterinburqdakı qətllər barədə nələri açıqladı?

Azərbaycan Rusiyanın Yekaterinburq vilayətində iki həmyerlimizin işgəncə ilə öldürülməsinə dair faktları Rusiya İstintaq Komitəsinə təqdim edib.

Bunu Ankarada səfərdə olan Baş prokuror Kamran Əliyev "Report"un Türkiyə bürosunun sualını cavablandırarkən deyib.

Baş prokuror qeyd edib ki, Yekaterinburqda azərbaycanlılara qarşı baş verən işgəncə faktları ilə bağlı Rusiya İstintaq Komitəsi ayrıca araşdırma aparır.

"Yekaterinburqda azərbaycanlılara qarşı baş verən hadisələrlə bağlı cinayət işi başlayıb. Bilirsiniz ki, Rusiya tərəfi ‒ həm İstintaq Komitəsi, həm də Baş Prokurorluqla mütəmadi əlaqələr saxlayırıq.

Hərçənd, Rusiya tərəfi deyir ki, zərərçəkənlər öz ölkələrinin vətəndaşlarıdır, amma Azərbaycan ikili vətəndaşlığı tanımadığı üçün onlar bizim vətəndaşlardır. Ona görə biz onlarla bağı ekspertizalar keçirdik, təəssüf olsun ki, həmin şəxslərin işgəncələr, döyülmələr, ağır bədən xəsarətləri alınması nəticəsində həyatlarını itirdikləri müəyyən olundu.

Həmin şəxslərlə də bağlı biz istintaq hərəkətləri aparırıq və əldə olunmuş bütün sübutları Rusiya İstintaq Komitəsinə təqdim etmişik. Rusiya tərəfindən mənə deyilib ki, həmin zorakılıq faktları ilə bağlı İstintaq Komitəsi tərəfindən ayrıca araşdırma aparılır. Ümid edirik ki, bu məsələ ilə bağlı açılmış cinayət işinin nəticələri olacaq", ‒ deyə Kamran Əliyev vurğulayıb.