"Azərbaycan cazı Berlində" adlı konsert | İsfar Sarabskinin çıxışı maraqla qarşılandı

Azərbaycanın Almaniyadakı səfirliyinin təşkilatçılığı ilə tanınmış caz musiqiçisi İsfar Sarabskinin rəhbərlik etdiyi kvartetin ifasında “Şimalda Xəzər küləyi: Azərbaycan cazı Berlində” adlı konsert proqramı təşkil olunub.

Çıxış edən Azərbaycanın Almaniyadakı səfiri Nəsimi Ağayev Azərbaycanda caz musiqisinin inkişafı barədə məlumat verib.

Qeyd olunub ki, caz muğamı kimi tanınan Azərbaycan cazı 1950-ci illərdə Bakıda – əsrlər boyu müxtəlif mədəniyyətlərin və adət-ənənələrin görüş yeri olmuş şəhərdə yaranmış füsunkar üslubdur. Bu musiqi cazın improvizasiya azadlığını muğamın emosional sədaları ilə birləşdirir.

Xüsusi vurğulanıb ki, İsfar Sarabski bu ənənəni uğurla davam etdirir və özünəməxsus üslubu ilə ona yeni çalarlar qazandırır. Sonra İsfar Sarabskinin kvarteti maraqlı konsert proqramı ilə çıxış edərək rəngarəng əsərlər ifa edib.