"Deyirlər ki, şəhid üçün ağlamaq lazım deyil" | İslam ümmətində ən böyük faciə - AMİN

“Amin” verilişində bu dəfə “Hacı Cavad” məscidinin imamı Ramil Aslanlı və fəlsəfə üzrə fəlsəfə doktoru Qədir Səfərovla Aşura günü barədə müzakirə aparılıb.

Ramil Aslanlının sözlərinə görə, Kərbəla faciəsi islam aləmində baş verən ən böyük hadisədir:

“I Yezid xəlifə olandan sonra İmam Hüseyndən özünə beyət etməsini tələb edəndə o, “biz peyğəmbər əhli-beytiyik. Yezid isə şərab içən, haqsız yerə insanları qətlə yetirən biridir. Mənim kimisi ona beyət etməz” cavabını verir. Bundan sonra aralarında müharibə baş verir. İmam Hüseyn istəsəydi, bir kəlməsi ilə sağ qala bilərdi. Lakin o, “Yezid bizi iki seçim qarşısında qoyub: ya ölüm, ya zillət. Zillət bizdən uzaqdır” deyir”.

Qədir Səfərov isə sözügedən müharibədə ölənlərin haqq üçün canlarını fəda etdiklərini söyləyib.

“İmam Hüseyn ölümə getdiyini bilirdi. Çünki 30 mindən ibarət düşmən qoşununa qarşı 72 nəfər idilər. Onları öldürən insanlar da kimləri qətlə yetirdiklərini yaxşı bilirdilər. Sonralar Kufə xalqı etdikləri əmələ görə dərin peşmanlıq keçirir. Bunun nəticəsində isə müxtəlif tövbə qrupları yaradılır”, ‒ deyə o bildirib.