"Ev yiyəsi deyib ki..." | Bağ evində səs-küy salanlar sakinləri bezdirdi | "Hər gün biri gəlir"

Yay mövsümündə bağ evlərinə tələbat artdıqca onların kirayəyə verilməsi bəzi hallarda sakinlərin narazılığına səbəb olur.

Baku TV-nin qaynar xəttinə daxil olan müraciətlərə əsasən, Buzovna qəsəbəsi, 43-cü məhəllə adlanan ərazidə yerləşən bağ evini kirayə götürən şəxslərin gecə saatlarınadək davam edən səs-küyü sakinlərin rahatlığını pozur.

Sakinlər iddia edirlər ki, ev sahibi ilə əlaqə saxlamağa çalışsalar da, bu cəhdlər nəticəsiz qalır.

“Gecəmiz, gündüzümüz yoxdur, qışqırıq və musiqi səsləri dayanmaq bilmir. Bir neçə dəfə ev sahibinə müraciət etmişik, lakin telefonlara cavab verilmir. Hər gün fərqli insanlar gəlirlər. Darvazanı döyüb xahiş edirik ki, səsi azaltsınlar, amma deyirlər ki, ev sahibi icazə verib, istədiklərini edə bilərlər”, – sakinlərdən biri bildirib.

Digər sakin isə qeyd edir ki, səs-küy ciddi narahatlıq yaradır:

“Hovuzdan istifadə edirlər, bəzən küçədə çılpaq şəkildə gəzirlər. Sürətlə avtomobil idarə edirlər. Burada uşaqlar oynayırlar, amma təhlükəsizlik nəzərə alınmır”.