"Gərək xəstəni qucağına alasan ki..." | Kənd sakinləri niyə acınacaqlı vəziyyətdə qalıb? - Baku TV

Lənkəran rayonunun ucqar dağ kəndlərindən olan Diryan, Gəgiran, Köhnə Gəgirə gedən yollarda vəziyyət heç də ürəkaçan deyil.

Bu ərazilərə yağış, qar yağan kimi rayon mərkəzi ilə əlaqənin kəsildiyi bildirilir. Yollar palçıq və qar səbəbindən keçilməz hala düşür.

“Xahiş edirik ki, dövlət qurumları yolumuza diqqət yetirsin və asfalt çəkilsin. Uşaqlarımız rahat gedib-gəlsin. Bu yollarla hərəkət etmək çox çətindir, maşınlarımız tez-tez sıradan çıxır. 1 manat qazanırıqsa, 15 manat xərcləyirik. Xəstələrimiz yolda qalır, bəzən isə maşın gedə bilmədiyi üçün ölürlər”, – sakinlərdən biri deyib.

Məsələ ilə bağlı Azərbaycan Avtomobil Yolları Dövlət Agentliyindən bildirilib ki, kəndlərarası avtomobil yollarının yenidən qurulması investisiya proqramları çərçivəsində həyata keçirilir.

Qurumdan qeyd olunub ki, sözügedən yolun yenidən qurulması üçün təkliflər hazırlanaraq aidiyyəti üzrə təqdim edilib:

“Bu təkliflərin qəbul edilərək investisiya proqramına daxil edilməsi nəzərdə tutulur. Daha sonra Lənkəran rayonunun Diryan-Jidi-Gəgiran-Köhnə Gəgir kəndlərinə gedən avtomobil yollarının əsaslı şəkildə yenidən qurulması planlaşdırılır”.