"Kimə deyirik, hamısı bizi yola verir" | "Qurd dərəsi" sakinləri şikayətə qalxdı - Baku TV

Sumqayıt şəhərindən cəmi 2-3 kilometr məsafədə yerləşən “Qurd dərəsi” yaşayış massivinin sakinləri uzun illərdir yol problemindən əziyyət çəkirlər.

Ərazidə yaşayanlar bildirirlər ki, yolların bərbad vəziyyətdə olması onların gündəlik həyatını ciddi şəkildə çətinləşdirir.

10 mindən çox sakinin yaşadığı yaşayış massivində yolların böyük hissəsi asfaltlanmayıb.

“20 ilə yaxındır burada yaşayırıq. Taksi çağırmaq olmur, təcili yardım gəlmir. Bu yolun bünövrəsi 1982-ci ildə qoyulub. O vaxtdan indiyədək yol çəkilməyib. Hara müraciət ediriksə, “bu gün-sabah” deyib bizi yola verirlər”, – deyə sakinlərdən biri bildirib.

Sakinlər yolun vəziyyətinin avtomobillərə də ciddi ziyan vurduğunu deyirlər.

sumqayıt“Yük maşınını, demək olar ki, hər həftə ustaya aparırıq. Görün minik avtomobilləri bu yollarda nə qədər əziyyət çəkir”, – sürücülərdən biri söyləyib.