"Köhnə evlər sökülməlidir, çünki..." | Bakıda bu ərazi abadlaşacaq

Bir vaxtlar sıx məhəllələr, dar küçələr və köhnə tikililər, indi isə yeni sima ‒ geniş park, ucsuz-bucaqsız yaşıllıqlar, istirahət zolağı. Uzun illər “Sovetski” kimi tanınan ərazinin adı çəkiləndə indi insanın ağlına artıq tarixi məhəllədən çox hamının könlünü oxşayan Mərkəzi Park gəlir.

Ümumiyyətlə, paytaxtımız bu gün təkcə Xəzər sahilindəki bulvarla yox, onlarla yeni salınan geniş parklarla nəfəs alır. Şəhərin mərkəzində bu qədər geniş yaşıllıq zonası yaratmaq təkcə estetika baxımından deyil, həm də ekoloji cəhətdən böyük önəm daşıyır.

“Sovetski” ərazisindəki parkın əhatə dairəsi yaxın günlərdə daha da genişləndiriləcək. Növbəti atılacaq addımlarla bura paytaxtın ən böyük park komplekslərindən biri olacaq.

Dövlət Şəhərsalma və Arxitektura Komitəsinin sektor müdiri Ramiz İdrisoğlu bildirib ki, daha 21 hektara yaxın ərazinin yenidən qurulması planlaşdırılır:

“Buranın həm iqlim şəraiti, həm florası, həm də ətraf mühitinə uyğun olaraq geniş yaşıllıq sahələrinin salınması, süni gölün yaradılması planlaşdırılıb”.