"Məni bu cür hədələyirlər" | Mənzil alan vətəndaşın başına oyun açıblar? - Baku TV

Xırdalan şəhəri, Mehdi Hüseynzadə küçəsi 313 ünvanında yaşayan sakin Baku TV-nin qaynar xəttinə müraciət edərək yaşadığı mənzillə bağlı iddialar səsləndirib.

Şikayətçi bildirir ki, illər əvvəl “SAS EkoPark” şirkətindən 118,6 kvadratmetr sahəsi olan mənzil alıb. Lakin sonradan məlum olub ki, mənzilin real sahəsi 96,1 kvadratmetrdir.

Vətəndaş məsələ ilə bağlı məhkəməyə müraciət etdiyini və qalib gəldiyini deyir.

Onun sözlərinə görə, bundan sonra şirkət tərəfindən müxtəlif təzyiqlərlə üzləşib: evinə qanunsuz şəkildə müdaxilə edilir, həmçinin işıq və su təchizatında fasilələr yaranır.

“Binaya zərər vurmaqla bağlı əsassız iddialar irəli sürüb məni hədələyirlər. Təkcə mənim yox, qardaşımın da mənzilində kvadrat problemi var. Bu problem demək olar ki, bütün binada mövcuddur. İnsanları aldadaraq bu işlərlə məşğul olurlar”, – deyə o qeyd edib.

Məsələ ilə bağlı şirkət əməkdaşı bildirib ki, binanın sütunlarına ziyan vurulub, həmçinin mənzilə avadanlıqlar quraşdırılarkən aşağı mərtəbəyə də zərər dəyib.